Elektrische Stromstärke

Die elektrischi Stroomsterki oder churz Stroomsterki git aa, wie vil elektrischi Laadig dur e definierte Kwerschnitt duuregoot, bezooge uf d Zit, wo si drfür brucht het. Dr Dransbort vo dr Laadig cha mä as grichdeti Beweegig von ere Zaal vo Elementarlaadige beschriibe, wo im Allgemäine vo Elektrone oder Ione dräit wärde; lueg au Elektrische Stroom.

D Stroomsterki wird im internazionale Äihäitesüsteem (SI) in dr Maassäihäit Ampere mit em Äihäitezäiche A aagee, noch em franzöösische Füüsiker und Mathematiker André-Marie Ampère. S Formlezäiche isch s $I$ , es chunnt vo „Intensidäät“ (gmäint isch d Sterki vom Stroom). Zum r Zitabhängigkäit kennzzäichne, verwändet mä dr Chliibuechstaabe $i$ für en Augeblickswärt.

Definizioon

Für e Laadigsfluss, wo zitlig konstant isch, gilt

$I=\frac{\mathrm{\Delta }Q}{\mathrm{\Delta }t}=\underset{A}{\int }\overrightarrow{J}\cdot \mathrm{d}\overrightarrow{A}$

mit dr Laadigsmängi $\mathrm{\Delta }Q$, wo in dr Zit $\mathrm{\Delta }t$ verschoobe wird, bzw. dr Stroomdichdi $\overrightarrow{J}$, wo dur e Flechenelimänt $\mathrm{d}A$ duurefliesst.

Dr elektrischi Stroom wird as Dransport vo Elementardäili aagluegt, also as quantisierti Gröössi. Wenn iiri Zaal z grooss isch, zum sä abzzelle, denn gseet mä d Stroomsterki as stetigi und differenzierbari Gröössi; lueg Elektrischi Laadig. Für e Stroomsterki, wo sich zitlig veränderet, gilt also

$i(t)=\underset{\mathrm{\Delta }t\to 0}{\lim }\frac{\mathrm{\Delta }Q(t)}{\mathrm{\Delta }t}=\frac{\mathrm{d}Q}{\mathrm{d}t}$

E zitlig periodisch veränderligi Stroomsterki (z. B. bi Wäggselstroom) het e zitlig konstante Effektivwärt, wo au dur s Formlezäiche $I$ kennzäichnet wird.